Bulan Bahasa Bali warsa 2026, pinaka bulan bahasa Bali kaping 8, sané ngemong téma “Atma Kerthi: Udiana Purnaning Jiwa”. Théma puniki mateges nyuciang jiwa pramana sané kaindargamayang pinaka tetamanan pacang maripurnayang jiwa pramana, malantaran antuk nyinggihang bahasa, aksara lan sastra Baliné. Tatujonnyané sampun janten mangdéné sida tan surut ngutsahayang ngayubin tur nyinggihang basa, aksara lan sastra Baliné. Punika mahawinan indiké puniki mangda kamargiang ring soang-soang kabubatén, kota, kecamatan rawuh ka désa adat, sekolah, miwah kampus-kampus.
Ring SMA Pariwisata-PGRI Dawan, Klungkung utawi ketah kabaos SMA Paris sane magenah ring Jalan Flamboyan 57 Semarapura, wénten makudang-kudang wimbakara sane kamargiang ngawit pamungkah ring rahina Buda Umanis Prangbakat, tanggal 18 Februari 2026 ngantos Wraspati Paing tanggal 19 Februari 2026. Acara wimbakara kabungkah olih Kepala SMAS Paris, Drs.Ida Bagus Gde Parwita, M.Pd. Kepala sekolah negesang indik kawigunan basa, aksara lan sastra Bali sané dahat mabuat pisan duaning basa, aksara lan sastra Bali sane kawedar ring lontar-lontar akéh madaging piteket sané mawiguna pisan ring kahuripan, sekadi indik pamargi adat, tamba, sasuluh miwah sané tiosan.
“Semaliha yen tan krama Bali, minakadi para sisya sané patut miara tur nyinggihang basa, aksara lan sastra Baliné raris sira sané pacang nikain.” Asapunika Kepala Sekolah nugesin.
Indik wimbakara sané kawentenang inggih punika: (1) mawirama (sekar agung), (2) masatua Bali, (3) nyurat lontar, (4) ngawacen aksara Bali, (5) dharma wacana, (6) ngawacen puisi Bali, (7) nyurat cerpen, (8) karaoké gending pop Bali, miwah (9) makarya baligrafi.
Para sisya yukti sida tertib nyaksiang parikrama wimbakara punika. Nanging sané polih aprésiasi dahat ramya inggih punika wimbakara masatua Bali lan karaoké gending pop Bali. Boya wantah sisya kémanten, rawuh guru lan pegawé sami nyarengin ngardi ramya parikrama punika.
Guru Bahasa Bali, Ni Nyoman Artini,S.Pd. mawosang angayubagia Pemerintah Provinsi Bali ngawéntenang Perda sané matatujon ngajegang basa, aksara lan sastra Baliné.
- Laporan: Tim Humas SMA Pariwisata PGRI Dawan Klungkung
- Foto: Dokumentasi SMA Pariwisata PGRI Dawan Klungkung
- Penyunting: I Made Sujaya
